السلامة الرقمية باللهجة التونسية/ كيفاش تحمي البيانات على الأجهزة

الأجهزة الرقمية الي نستعملها  لأهداف مهنية و شخصية فيها برشا معلومات . الpc , التليفون، التابلات ، الdisque dur , تصاورو فيديوات و ساعات فما ملفات فيبالك فسحتها

شنية ينجم يصير كان شكون شاف ملفاتك منغير معرفتك؟كان شكون سرق الappareil الي فيه معلومات حساسة مهنية ولا شخصية ؟ ولا ضيعته ؟ كان فسد و خسرت المعلومات المهمة اللي فيه. تبع النصائح هاذي بش تحافظ على معلوماتك

•  احمي الأجهزة فيزيائيًا :

تظهر حاجة عادية اما هي من اهم الحاجات اللي تنجم تعملها بش تحمي معلوماتك هي تستحفظ على les appareilles متاعك. تنجم تضيعه ولا يسرقولك الpc, التليفون ولا أي support فيه معلومات.

خلي أجهزتك في بلاصة آمنة كي ما تستعملهاش. رد بالك على محامل التخزين ادخارية كيف الفلاش، disque dur و كان تنجم اعمللهم كوبة و مفتاح.متخليش lأجهزتك  منغير عشة في بلايص ينجمو يسرقونه. خمم تخليهم في الدار كي تسافر ولا كي تمشي لبلايص وين يسألونك تعطي أجهزتك الرقمية كيف المطارات المكاتب الحكومية و السفارات. كان تستعملهم في بلايص عمومية خمم تسري câble Kensington (قفل للجهاز الرقمي)

• احمي الأجهزة متاعك بكلمة سر :

كي تحمي الأجهزة بكلمة سر قوية يضمنلك أي حتى حد ماهو بش يثبت في ملفاتك و يعطيك حماية لمعلوماتك كان تسرقت ولا كان ضاع الجهاز . فعل القفل الأوتوماتيكي بش يتسكرو بعد مدة . اعرف كيفاش تقفلو يدويا و تذكر تعملها كان بعدت عليه

• شفر الأجهزة 

كان جهازك تعرض للسرقة ولا ضاع اللي عنده ينجم يشوف الملفات الي فيهم 

هذاكا علاش احسن حل بش تحمي البيانات هي تشفرها و تخلي معلوماتك المش مفهومة كان الي عنده كلمة السر ولا مفتاح التشفير

• اعمل نسخة احتياطية 

شكون يفركس على ملفاتك مش الخطر الوحيد الي تواجهو زادا تنجم ما توصلش لملفات  متنجمش تعوضها تنجم تخسر معلوماتك من مشكلة في الجهاز ولا هجوم برنامج فدية هذاكا علاش احسن حاجة تعمل نسخة احتياطية ديما بطريقة دورية و منظمة 

• تستعمل مضاد فيروسات و اعمل mise à jour للأجهزة متاعك :

Antivirus باهي بش يحمي الأجهزة متاعك مالبرمجيات الخبيثة اللي تنجم تسرق ولا تفسد معلوماتك. مالمهم يبدى عندك مضاد فيروسات مرخص و  كي تستعمل ويندوز يجي مع الantivirus 

متاعه 

يازمك ديما تعمل mise à jour و مالأحسن يبدا عندك التحديث التلقائي 

• اعمل supprimer للملفات بطريقة آمنة:

كي نعملو supprimer للهاتف ولا محامل التخزين مايساهمش في سحبها بطريقة كاملة. المعلومات تبقى في الجهاز و نجمو  نسترجعوها. الطريقة الوحيدة بش نضمنو الي تفسخت هي نستعملو أداة تعوض المعلومات الي فسخناها بشفرات مخلوضة. كان تحب تعمل نسخة احتياطية تذكر الي يازم تفسخ زادا النسخ الاحتياطية 

 

تبع الخطوات بش يكون عندك اداة تفسخ الملفات بطريقة دائمة و آمنة. كان تستعمل حاجة كيف الفلاش، متنجمش تحذف الملفات بطريقة دائمة

• تخلص بشكل آمن مالأجهزة القديمة :

قبل ما تبيع ولا ترسكل حاسوب قديم تليفون ولا أي محمل تخزين .تأكد  متخليش أي معلومات شخصية ولا سرية عليه. اعمل supprimer للبيانات متاعك و رجع les paramètres كيف الأول. 

كان بش تتخلص مالcd ولا dvd , flash ولا أي محمل مالأحسن تكسرها

• ما تشاركش معلومات سرية 

احسن طريقة بش تأمن بيانتك الحساسة هي ما تشاركها مع حتى حد.  كي تشاركها معادش تنجم تتحكم فيها